Аеродромите низ Азија се ставени во состојба на зголемена подготвеност откако Индија потврди два случаи на смртоносниот вирус нипа во индиската држава Западен Бенгал  минатиот месец, пишува „Гардијан“.

Тајланд, Непал и Виетнам се меѓу земјите што воведоа дополнителен скрининг на патниците на аеродромите, поради страв од пошироко ширење на вирусот, кој може да се пренесе од животни на луѓе и има исклучително висока стапка на смртност.

Индиското Министерство за здравство потврди дека од декември се регистрирани два случаи во Западен Бенгал, но нагласи дека вирусот бил „навремено ставен под контрола“. Властите не објавија детали за заразените пациенти, но информираа дека околу 200 блиски контакти биле тестирани и не биле откриени нови случаи.

Што е вирусот нипа и зошто е толку смртоносен?

Вирусот нипа најчесто се пренесува на луѓето од животни, особено од свињи и големи лилјаци, преку директен контакт или преку нивните телесни секрети. Периодот на инкубација трае од четири до 14 дена.

Почетните симптоми најчесто вклучуваат висока температура, мачнина, повраќање и респираторни проблеми, кои можат да преминат во пневмонија. Во потешки случаи, вирусот предизвикува опасно отекување на мозокот (енцефалитис), што доведува до невролошки симптоми како сонливост, дезориентација и напади.

Вирусот е високо заразен меѓу луѓето и Светската здравствена организација (СЗО) го смета за високоризичен за епидемии, особено поради фактот што не постои вакцина. Стапката на смртност се движи меѓу 40 и 75 отсто, што го прави значително поопасен од ковид-19.

Кога се случиле претходните епидемии?

Болеста првпат била идентификувана во 1998 година меѓу одгледувачи на свињи во Малезија, кога загинале повеќе од 100 луѓе. Името го добила по селото каде што првпат била откриена.

Оттогаш, случаи и помали епидемии се регистрираат речиси секоја година во азиските земји, меѓу кои Индија, Филипините, Сингапур и Малезија. Вирусот редовно се појавува и во Бангладеш, а првиот случај во Индија бил регистриран во 2001 година, токму во Западен Бенгал, кој се граничи со Бангладеш.

Во Бангладеш, ширењето често се поврзува со консумирање сиров сок од палма, бидејќи овошните лилјаци (познати и како летечки лисици) живеат на палмите и го контаминираат сокот.

Во 2018 година, најмалку 17 лица починаа од вирусот нипа во индиската држава Керала, а уште двајца починаа во 2023 година. Најновата појава е особено значајна бидејќи ова се првите регистрирани случаи во Западен Бенгал од 2007 година наваму.

Индиските здравствени власти соопштија дека биле спроведени засилени мерки за надзор, лабораториски тестирања и теренски истраги, што овозможило навремено локализирање на случаите. Досега, од декември се потврдени само два случаи и состојбата, како што наведуваат, е под постојан мониторинг.

И покрај тоа, неколку земји воведоа превентивни мерки на аеродромите и граничните премини. Тајланд, Виетнам и Индонезија започнаа дополнителни контроли, вклучувајќи мерење температура и здравствени декларации за патници кои пристигнуваат од Индија. Мјанмар препорача да се избегнуваат несуштински патувања во Западен Бенгал, додека Кина ги зајакна мерките за спречување на болести во пограничните области.

Од Индија, пак, порачуваат дека извештаите за нагло зголемување на случаите се „шпекулативни и неточни“.