Ако често се споредувате со поранешната партнерка или поранешниот партнер на вашата сакана личност, можно е да се соочувате со таканаречениот синдром „Ребека“.

Овој поим потекнува од романот „Ребека“ на писателката Дафне ди Морие, во кој главната хероина е опседната со споредување со покојната сопруга на својот сопруг. Денес, синдромот „Ребека“ се користи како популарен назив за силна љубомора насочена кон љубовното минато на партнерот.

Луѓето кои го доживуваат овој феномен често ја идеализираат поранешната врска на партнерот и чувствуваат несигурност, страв од споредување или убедување дека никогаш нема да можат да ги достигнат квалитетите што му ги припишуваат на поранешниот партнер.

Знаци кои можат да укажуваат на синдромот „Ребека“

• Постојано размислување за поранешната врска на партнерот.
• Често споредување со поранешната личност по изглед, карактер, успех или животен стил.
• Чувство на тага, лутина или непријатност кога се споменува поранешниот партнер.
• Постојано поставување прашања за детали од минатата врска.
• Следење профили на социјалните мрежи и пребарување информации за поранешната личност.
• Убедување дека партнерот ја сакал повеќе поранешната личност или дека таа врска била подобра.
• Љубомора кон спомени, фотографии или заеднички искуства од минатото.
• Постојана потреба за потврда дека сегашната врска е поважна и посилна.
• Тешкотии да се прифати фактот дека партнерот има љубовно минато.

Кој е најподложен на овој феномен?

Синдромот „Ребека“ почесто се појавува кај луѓе со ниска самодоверба, изразена несигурност или силна потреба за споредување со другите.

Поголема склоност кон ваква љубомора имаат и лица кои: имаат страв од напуштање, во минатото доживеале изневерување или отфрлање, ги идеализираат другите луѓе, имаат потреба од постојана потврда на љубовта и поминуваат многу време анализирајќи ја љубовната историја на партнерот.

Како да се справите со ваквата љубомора?

Разговорот со партнерот, близок пријател или личност на која ѝ верувате може значително да помогне. Често токму кога ќе ги изговориме нашите стравови наглас, полесно согледуваме дали тие се реални или произлегуваат од несигурност.

Доколку љубомората стане опсесивна и почне да влијае врз квалитетот на врската, експертите советуваат разговор со психотерапевт. На тој начин полесно можат да се откријат длабоките причини и емоционалните „окидачи“ што ја поттикнуваат оваа појава.

Важно е да се нагласи дека синдромот „Ребека“ не е официјална психијатриска дијагноза, туку термин што се користи за опишување на интензивна љубомора кон љубовното минато на партнерот. Сепак, ако не се препознае навреме, може сериозно да влијае врз самодовербата и врз квалитетот на врската.