Шпански фудбалски талент ќе му биде соиграч на Алиоски во Ал Ахли
Габри Веига (21) е еден од најдобрите млади шпански фудбалери. Играчот од средниот ред на Селта во последниве месеци наголемо се поврзуваше со Реал Мадрид и Наполи.
На почетокот на пролетта се чинеше дека Реал ќе го откупи и ќе го остави во Селта на позајмица, но договор не беше постигнат. Наполи на Елиф Елмас цело лето преговараше со Селта и играчот, но трансфер не се реализираше.
Наполи се откажа од потписот на Веига откако во петокот Селта ги промени условите на трансферот, а потоа во приказната влезе и клубот на Езџан Алиоски, Ал Ахли од Саудиска Арабија, кој ѝ го понуди на Селта тоа што го бараше.
Новинарот Фабрицио Романо пишува дека преговорите се воделе во тајност и не се познати конкретни бројки.
Според „Трансфермаркт“, Веига вреди 30 милиони евра, а во „Ла Лига“ на 50 натпревари постигна 11 гола и четирипати асистираше. Има девет настапи за У-21 репрезентацијата на Шпанија.