Мадрид одлучи да го затвори воздушиот простор на земјата за американските авиони кои учествуваат во војната против Иран, објави министерката за одбрана Маргарита Роблес, јавуват светските новински агенции.

Шпанија претходно им забрани на САД да ги користат заедничките воени бази во земјата за изведување напади врз Иран.

„Ние не одобруваме ниту употреба на воени бази, ниту употреба на нашиот воздушен простор за дејствија поврзани со војната во Иран“, изјави Роблес.

Затворањето на воздушниот простор ги принудува воените авиони да ја заобиколат Шпанија на пат кон нивните цели на Блискиот Исток, но тоа не вклучува итни ситуации, објави весникот „Ел Паис“.

„Оваа одлука е дел од одлуките што веќе ги донесе шпанската влада да не учествува или да не придонесува кон војна што беше започната еднострано и спротивно на меѓународното право“, рече министерот за економија Карлос Куерпо.

Шпанскиот премиер Педро Санчез е еден од најгласните европски противници на американско-израелските напади врз Иран, сметајќи дека се неодговорни и нелегални.