Македонски камионџија бил казнет со 150 евра и морал доброволно да ја напушти Германија со авион за да избегне дополнителни мерки, откако за три дена го пречекорил дозволениот престој во шенген-зоната согласно новото правило 90/180 во ЕУ, извести Асоцијацијата на транспортери „Макам транс“.

Оттаму апелираат до превозниците да внимаваат и да ги проверуваат дали деновите за престој на возачите во шенген-зоната се во склад со новите прописи на ЕУ, кои дозволуваат возачите од земјите надвор од ЕУ да престојуваат во шенген-зоната најмногу 90 дена во последните 180 дена.

„Денес на пристаништето Росток – Германија контролиран е македонски возач кај кој е утврдено надминување на три дена од дозволените 90 во 180. За истото изречена им е парична казна од 150 евра и побарано е потврдна резервација за авион со кој доброволно ќе ја напушти Германија, а возилото кое е товарено ќе се предаде на друг возач од истото превозно трговско друштво да ја продолжи превозната операција. При напуштање на Германија, на возачот ќе му биде издаден документ на кој ќе е наведено кога повторно ќе му биде дозволен влез во шенген-зоната“, се вели во објавата.

Од „Макам транс“ посочуваат дека и превозници од земјите во регионот се соочуваат со истиот проблем и дека од нив дознаваат дека според сега важечките прописи за престој, доколку по втор пат при контрола се фати истиот возач за надминување на деновите, можно е изрекување на забрана од 5 години за влез во Шенген зоната.
„Согласно искуството од регионот се препорачува избегнување на пристаништето Росток и Салзбург како места на кои најчесто се врши контрола“, велат од „Макам транс“.