Откако СДСМ вечерва соопшти дека Извршниот одбор на партијата донел одлука да започне постапка за исклучување на Петре Шилегов, поранешниот скопски градоначалник и пратеник од СДСМ за ова слушна во емисија во живо, па беше запрашан за коментар.

Одлуката на ИО на опозициската партија доаѓа откако Шилегов во изминатите месеци јавно го критикуваше лидерот на СДСМ, Венко Филипче, од кого побара да даде оставка.

Шилегов оваа вест ја дочека додека гостуваше во емисијата „Ноќно студио“ на „4ТВ“, каде зборуваше во својство на бранител на еден од обвинетите во судењето за пожарот во дискотеката „Пулс“ во Кочани.

Запрашан за коментар, Шилегов рече дека во почит на денешниот ден и трагедијата во Кочани вечерва нема да дава политички изјави, најавувајќи дека одлуката на партијата ќе ја коментира утре.

„Утре ќе го имам коментарот, од должна почит кон луѓето кои го загубија животот на денешен ден. Не мислам дека сега е моментот политички, а имам што да кажам за психотропните супстанци на одредени лица и парите што така лесно ги имаат заработено во изминатиот период“, рече Шилегов.

Шилегов своевремено беше и претседател на Градската организација на СДСМ во Скопје, а членуваше и во Извршниот одбор, кој вечерва одлучи да го исклучи од партијата.

Моторот остана зарибан и по промените на чело на СДСМ