Сопствениците на кучиња честото лижење на лицето го доживуваат како бакнеж и израз на љубов, но овој симпатичен гест може да има и други, понекогаш изненадувачки значења. Со оглед дека кучињата не можат да зборуваат, нивниот говор на телото е клучен за разбирање на нивните чувства и намери. Понекогаш постапките на кучето имаат повеќе значења или сигнализираат нешто сосема неочекувано, а лижењето на лицето е еден од таквите примери, пишува „Парад петс“.

Александра Басет, основач и тренер, објаснува зошто е важно да се разберат мотивите зад однесувањето на кучињата.

– Кога ја разбирате мотивацијата на кучето, можете да реагирате промислено, а не емоционално. Кучињата понекогаш прават нешта што ги збунуваат луѓето -рекла Басет.

Таа истакнува дека е клучно да се откријат причините за лижењето, бидејќи секое однесување на кучето претставува обид да се задоволи некоја потреба, да се реши проблем или да се постигне исполнување од кучешка перспектива.

– Ако ја занемарите таа цел или не му овозможите на кучето соодветни начини за изразување на природните нагони, ризикувате потиснување на нешто што е клучно за неговата добросостојба. Исто така, би можеле да ги пропуштите сигналите што кучето се обидува да ви ги испрати – предупредила Басет.

1. Барање внимание

Иако не зборуваат, кучињата комуницираат со своето однесување, а лижењето е еден од начините на кои бараат внимание или го поттикнуваат сопственикот на некоја акција. Басет објаснува дека кучињата брзо учат со кои постапки предизвикуваат реакција, па дури и смеата, зборувањето, галењето или нежното одбивање можат да ја зацврстат таа навика.

Во зависност од делот на денот, лижењето може да значи:

– Наутро: „Време е за појадок“ или „Морам надвор во тоалет“.

– За време на игра: изразување нетрпеливост или желба за активност.

– За време на галење: повик за уште поголема блискост.

2. Барање простор

Лижењето на лицето не е секогаш знак на приврзаност.

– Понекогаш лижењето може да биде сигнал за стрес. Кога кучето лиже притоа придвижувајќи ја главата нанапред, има проширени зеници, подвиткана опашка или по интензивното лижење се врти на другата страна, тоа всушност порачува: ‘Ве молам, дајте ми простор’ – објаснила Басет.

Ова однесување се нарекува и „бакнеж за отпуштање“. Тоа е комбинација од сигнали за притисок и избегнување кои кучињата ги користат во стресни ситуации. Најдобро е да реагирате со нежна интервенција: пренасочете го вниманието на кучето или оддалечете го детето или возрасниот од интеракцијата.

3. Негување и поврзување

Лижењето често е знак за „уредување“ и воспоставување блискост. Кучињата се социјални суштества и често ги средуваат оние со кои се блиски. Кучките ги лижат кученцата за да ги исчистат и утешат, а возрасните кучиња се лижат меѓусебно од приврзаност. Кога кучето ве лиже додека се одмарате, тоа е суптилен знак дека во вашето друштво се чувствува сигурно и задоволно.

4. Ослободување од стрес

Лижењето помага при самосмирување бидејќи го поттикнува ослободувањето на ендорфин (хормон на среќата). Ако забележите дека кучето постојано ве лиже вас или мебелот, тоа можеби се обидува да се смири. Сепак, ако ова стане компулсивно, може да биде знак дека на кучето му е досадно или не добива доволно ментална стимулација.

5. Знак на покорност и почит

Понекогаш кучињата лижат за да покажат покорност и да испратат порака: „Не сум закана“ и „Те почитувам“. Овој вид лижење често е придружен со наведната глава, благ поглед или превртување на грб. Со овие сигнали кучето се обидува да одржи склад и да покаже дека е пријателски расположено.

6. Искажување љубов, возбуда и утеха

Секако, приврзаноста е една од главните причини. Кучињата даваат „среќни бакнежи“ за да покажат дека се возбудени што ве гледаат. Бидејќи вашата реакција (смеа или галење) е позитивна, кучето го учи ова како сигурен начин да ја изрази својата љубов кон вас.