Шекеринска: Нема да учествувам во следната влада

Радмила Шекеринска, министерка за одбрана/Фото: Скришот

Министерката за одбрана Радмила Шекеринска денеска изјави дека нема да биде дел од новата Влада. Таа потсети дека пред осум месеци се повлекла од партиската функција заменик-претседател на СДСМ оти не се согласувала со дел од политиките, кои според неа, придонеле за пораз на локалните избори и не очекува работите да се сменат.

– За жал, мојот впечаток е дека од тие лекции не ги научивме и дека некои од пораките на јавноста не ги чувме или не ги разбравме, и затоа мислам дека единствената чесна и принципиелна одлука е да не учествувам во следната Влада, нагласи Шекеринска.

Потенцира дека во изминатите четири и пол години, таа, како и другите нејзини колеги, и служела на државата, и се оддолжила за голема доверба добиена од граѓаните, со членство во НАТО и најбрза воена интеграција од страна на која било кандидатка членка на Алијансата. И она што за неа било особено важно, апсолутно променета ситуација во нашата Армија.

– Тоа беше резултат затоа што работевме чесно, принципиелно и трудољубиво. Така треба да се работи и тогаш резултатите доаѓаат. Меѓутоа, ако не сме принципиелни кон себе, не можеме да бидеме принципиелни ни кон граѓаните, рече Шекеринска.

Во врска со односите меѓу Русија и Украина и можноста за ескалација на состојбата, Шекеринска рече дека и нашата држава, како и другите членки на Алијансата го поддржале коминикето на НАТО со кое се изразува сериозна загриженост заради ескалацијата на состојбата, особено со зголемувањето на руски трупи на границата со Украина.

– Ја споделуваме загриженоста и сметаме дека ова влијае на безбедноста, не само на Украина, туку и на целиот континет. Поддршка од страна на сите членки на Алијансата за територијалниот интегритет и суверенитет на Украина. Беше испратен повик до Русија да ги намали тензиите и да ги повлече трупите. Во исто време НАТО изрази подготвеност да разговара со Русија, меѓутоа, тоа да не бидат флоскули туку за подобрување на состојбата и комуникацијата. Каква било нестабилност на европскиот континет, не поминува без безбедносни импликации врз останатите држави, рече Шекеринска.

Запрашана за развојот на односите со Бугарија таа одговори:

-Сите прашања лошо влијаеја за нашите односи со Бугарија. Дијалогот мора да се интензивира. Шансите нема да бидат одма или веднаш. Немам преговарачка рамка, а блокирани сме. Мора да видиме кои се нашите интереси, да бидеме умни во преговорите со Бугарија и да и отежниме на Бугарија да го одржува тешко одржливото вето кон Република Северна Македонија, рече министерката Шекеринска.

Таа заедно со генерал полковникот најави по еден бесплатен оброк за секој приданик на АРМ. Проектот ќе започне да се реализира во 2022 година за сите војници во касарната во Штип, а во 2023 година во сите гарнизони на Армијата.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот