Шалке непријатно изненаден во Бундеслигата (ВИДЕО)
Три важни бода освои составот на Дизелдорф на домашен терен после пресвртот направен од страна на Хенингс и Караман.
Денеска се одиграа уште пет натпревари во 28 коло од најсилното германско фудбалско првенство. Изненадување приреди Дизелдорф кој на домашен терен со 2:1 успеа да ја совлада екипата на Шалке.
Гостите водеа од 53 минута со голот на МекКени, но играчите на Рослер за пет минути направија пресврт.
Прво израмни Хенингс во 63 минута, а конечниот епилог на „Меркур Спил-Арената“ го постави Караман. Три важни бода за Дизелдорф во битката за опстанок, моментно е на 16 место со 27 бодови, само еден помалку зад засега сигурниот Мајнц.
Шалке направи нов чекор назад во борбата за една од европозициите и е на деветтото место со 37 бодови. Загрижувачки за тренерот Вагнер е што ова е трет пораз во низа од стартот на продолжувањето на сезоната.
Во останатите дуели: Лајпциг-Херта Берлин 2:2, Аугсбург-Падерборн 0:0, Хофенхајм-Келн 3:1 и Унион Берлин-Мајнц 1:1.