Пелистер денеска ги започна подготовките, а ма првиот собир одржан беше состанок на кој беа запознати сите со плановите и амбициите на клубот.

Тренерот на битолчани, Марјан Секуловски посакува да биде остварена главната цел, а тоа е враќање во елитата.

– Почнавме со единствена цел да бидеме оптимално подготвени за предизвиците кои што нè очекуваат во првенството. Амбициите се повеќе од јасни, а тоа е враќање во Прва лига. Во овој период ангажиравме пет искусни играчи и тоа битолчани на кои овој им е матичен клуб. Планирано е да се ангажираат уште двајца или тројца на позиции на кои сме дефицитарни. Ќе се подготвуваме во Битола, а контролни натпревари ќе играме во Битола, Охрид и Струга. Верувам дека почетокот на првенството ќе го дочекаме оптимално подготвени и комлетни со играчкиот кадар – вели Секуловски.

Претходно клубот ги договори Благоја Љамчевски, од Тиквеш, со прволигашко искуство. Потоа, дојде голманот Илче Петровски од Брегалница, а од штипскиот клуб е ангажиран и Филип Миленковски.

Продолжени се договорите со Борче Маневски, Петар Љамчевски, Јовче Трајковски и Филип Трајчевски. Ново засилување е и 28-годишниот Бурхан Мустафов, искусен прволигашки играч кој потекнува од школата на ФК Пелистер.

Исто така Пелистер се договори и со своите младинци да останат да ги бранат боите и понатаму на својот матичен клуб Бојан Стефановски, Стефан Ивановски, Мартин Андоновски, Христијан Торневски и Амир Фејзуловски.

Капитенот Христијан Драгарски останува верен на клубот, столбот на одбраната, а дефанзивниот дел го освежува Христијан Гроздановски кој претходно ги бранеше боите на Воска, Работнички и Силекс.