СЕКОЈА ЧЕСТ: Јане си доби автограм од Бекам
Најпознатиот фан на македонската фудбалска репрезентација, малиот херој Јане Велковски имаше можност да се запознае и со планетарната мегаѕвезда Дејвид Бекам. Јане Велковски има свое обраќање на глобалниот самит во Обединетите нации во Њујорк и побара да се преземе акција за да се заштитат и промовираат правата на децата, во рамки на годинашниот „Светски ден на детето“.
Јане Велковски денеска е гостин во Обединетите Нации, каде одржа говор по повод Светскиот ден на детето. Ова 11-годишно момче конечно ќе го добие лекот спинраза, со кој ќе има подобар живот и ќе може да го исполни најголемиот сон, да заигра фудбал.
– Навистина сум многу возбуден, затоа што ова е огромен настан. Но истовремено сум многу среќен, затоа што ќе можам да му кажам на целиот свет дека сите се еднакви и дека луѓето со попреченост може да ги прават истите работи како и сите други. И дури и да не можат да ги прават сите работи, тоа не значи дека не треба да уживаат во животот – вели Јане.
Дејвид Бекам со задоволство му даде автограм на Јане Велковски, а тој му раскажа дека во живо го следеше мечот на неговиот некогашен клуб Манчестер Јунајтед, и тоа на покана на Пол Погба.