Фудбалската репрезентација на Македонија им се врати на победите по трите ремија и го совлада Лихтенштајн со 0:2 во рамки на квалификациите за СП 2022 година со што остана во игра за освојување на второто место во групата Ј.

Ова воедно беше прва победа за Благоја Милевски како селектор на сениорската репрезентација откако во септемврискиот квалификациски циклус три пати одигра нерешено и тоа против Ерменија (0:0), Исланд (2:2) и Романија (0:0).

Селекцијата на Лихтенштајн беше идеален противник за прекинување на серијата од три натпревари без победа и тоа фудбалерите го демонстририраа во текот на сите 90 минути.

Избраниците на селекторот Милевски од првата минута тргнаа офанзивно,  постојано се играше на половината на Лихтенштајн, се редеа шанси пред голот на Бухел, а одличната игра во првиот дел ја круниса Дарко Велковски со голот во 39. минута.

По корнерот, настана мешаница во петерецот на Бухел каде најснаодлив беше Велковски и го отвори резултатот.

Претходно свои шанси имаа Трајковски во третата минута, Чурлинов во 11 минута се лизна во шеснаесетникот иако беше во изгледна шанса, а една минута подоцна Милан Ристовски со глава шутираше над голот.

Во 18. минута судијата Франковски го поништи голот на Трајковски. По одбиената топка од голманот таа дојде до Елмас кој веднаш шутираше но на топката налета Трајковски и ја смести во мрежата. Судијата  Франковски го поништи голот поради офсајд на Трајковски.
Како што играа во првото полувреме, избраниците на Милевски продолжија во ист ритам и во вториот дел.

Доминацијата на теренот беше наградена во 66 минута кога Езџјан Алиоски од пенал зголеми на 0:2 откако претходно Аријан Адеми беше фаулиран во шеснаесетникот на Лихтенштајн. Судијата Франковски по прегледување на снимката покажа на белата точка по што сигурен реализатор беше Алиски.
До крајот, Македонија постигна уште два гола, преку Николов во 74 минута и Чурлинов во 83 минута за конечни 0:4 за прво славје на селекторот Милевски.

Фудбалерите со убедливиот триумф и прикажаната игра во одлична атмосфера ќе го очекуваат и натпреварот на 11 октомври против Германија кој ќе се игра на Националната Арена „Тодор Проески“ во Скопје.

Лихтенштајн – Македонија 0:4 (0:1)

„Рајнпарк стадион“ во Вадуз. Стрелци: Велковски 39′, Алиоски 66′ , Николов 74′, Чурлинов 83′.

ЛИХТЕНШТАЈН: Бухел, С. Волфингер (од 61′ Јилдиз), Малин, Кауфман, Хофер, Гопер, Селе (од 75′ Бухел), Волфингер (Гринефелдер 79′), Хеслер, Фрик, А. Фрик

МАКЕДОНИЈА: Димитриевски, С. Ристовски (од 76′ Ракип), Велковски (од 76′ Зајков), К. Ристевски, Алиоски (од 70′ Б. Николов), Адеми (од 70′ Ашковски), Спировски, Елмас, Трајковски, Чурлинов, М. Ристовски (од 61′ Миовски).