Полицијата сè уште трага по двајцата мажи што го киднапираа македонскиот пејач Даниел Кајмакоски (43) рано наутро во неделата во Бетон хала во Белград. Киднаперите, врзаниот Кајмакоски, го возеле 63 километри со неговиот автомобил, бегајќи од полицијата. Истрагата сега е насочена во неколку насоки.

Даниел Кајмакоски бил врзан на задното седиште од неговото „волво“, а кога киднаперите се забиле во банкината кај Рума, полицијата го пронашла пејачот, пишува српски „Блиц“.

– Потрагата е во полн ек. Во текот на овие два дена, полицијата го пребара целиот терен околу местото каде што беше пронајден автомобилот, кој киднаперите го оставиле зад себе и бегството го продолжиле пеш. Пребарани се голем број напуштени куќи во таа област, извршени се разговори со мештаните, а се земени и снимки од камерите – рекол извор, додавајќи дека сега е важно осомничените да не ја преминат границата.

– Невозможно е да го сторат тоа преку легални гранични премини, но би можеле да го направат тоа преку некои нелегални начини, и тоа е она на што сега се фокусирани истражителите – објаснил изворот.

Според неговите зборови, истрагата за киднапирањето на Кајмакоски оди во неколку насоки.

– Се утврдува дали уметникот можеби бил таргетиран, односно дали некој имал интерес да го киднапираат него и да бара откуп од 20.000 евра. Истрагата се обидува да открие дали киднаперите имале помагач во опкружувањето на пејачот или некој можеби од клубот им дал детали на сторителите – објаснил соговорникот за „Курир“ и додал дека постои и друга насока на истрагата.

– Со оглед на тоа што пејачот ги опишал двајцата киднапери како странци, луѓе кои зборувале англиски и турски јазик, не е исклучена ниту можноста дека го извршиле киднапирањето „за своја сметка“. Имено, се проверува можноста дали двајцата странци во Бетон халата забележале добар автомобил и маж кој седел сам во него, па затоа одлучиле на овој начин да дојдат до пари – рекол изворот и додал дека инспекторите зеле и камери од Бетон халата и дека утврдуваат дали некој од нив ги снимил лицата на киднаперите.

Откако неговата сопруга Марина се огласи за „Блиц“, која откри дека пејачот бил под стрес, и Бранислав Станишиќ – адвокатот на Кајмакоски, изјавил дека оваа ситуација имала одредени последици и дека полицијата работи напорно за да ги изведе осомничените пред лицето на правдата.

– Истрагата е во тек и ќе продолжи. Што се однесува до Даниел, тој е психички и физички добро, тоа е најважно за семејството и за него сега. Оваа ситуација остави некои шокантни последици, но му благодарам на Бог што ги надминува.

ВИДЕО | Даниел Кајмакоски е киднапиран во Белград – српската полиција е на нозе