Студиото „Сони пикчерс“ (Sony Pictures) подготвува ново продолжение на популарната акциона франшиза „Чарлиевите ангели“. За пишување на сценариото е ангажиран сценаристот Пит Кјарели, познат по работата на филмовите „Принуден брак“ и „Луди богати азијци“, пренесува „Холивуд репортер“.

Проектот засега е во почетна фаза и сè уште нема официјални информации за продуцентскиот тим. Сепак, според извори блиски до продукцијата, се очекува да се врати и Дру Баримор заедно со нејзината продукциска куќа „Флауер Филмс“, која стоеше зад успешните филмски верзии од почетокот на 2000-тите.

„Чарлиевите ангели“ првично беше криминалистичка серија што се емитуваше од 1976 до 1981 година на „Еј-би-си“ и брзо прерасна во култен телевизиски феномен. Главните улоги ги толкуваа Фара Фосет, Кејт Џексон и Жаклин Смит, додека приказната ги следеше трите талентирани детективки кои работат за мистериозниот Чарли Таунсенд, комуникацијата со нив ја одржуваше Џон Бозли.

Франшизата доби нов живот во 2000 година со филмската адаптација во која глумеа Дру Баримор, Камерон Дијаз и Луси Лу, која постигна голем комерцијален успех на светските кино благајни. Во 2003 година беше снимено и продолжението „Чарлиевите ангели: Полна брзина“.

Подоцнежните обиди за враќање на приказната не беа толку успешни — телевизиската верзија од 2011 година беше откажана по неколку епизоди, а филмот од 2019 година, со Кристен Стјуарт, Наоми Скот и Ела Балинска, не ги исполни очекувањата во кината.

Сценаристот Пит Кјарели зад себе има повеќе познати проекти, меѓу кои „Мајстори на илузијата 2“ и филмската адаптација „Луди богати азијци“. Тој во моментов работи и на новиот анимиран проект на „Сони пикчерс анимација“, „ГОАТ“, продуциран од кошаркарот Стивен Кари.

Новото продолжение на „Чарлиевите ангели“ е сè уште во развој, а повеќе детали за актерската екипа и датумот на премиера се очекуваат во наредниот период.