СДСМ поднесува законски измени за продолжување на важноста на возачките дозволи
Пратеничката група на СДСМ ќе поднесе предлог за законски измени со кои возачките дозволи, сообраќајните дозволи, осигурителните полиси и сообраќајните книшки ќе им биде продолжена важноста, изјави денеска пратеникот од владејачката коалиција Дарко Каевски.
„Со измени на законите, граѓаните и понатаму да може да ги користат на територијата на државата. Во меѓувреме, граѓаните не смее да се казнуваат, никој не смее да биде казнет за учество во сообраќајот. Ова е соодветно решение, возачките се за домашна употреба и мора да важат и понатаму. За овие законски решенија очекуваме поддршка од сите пратенички групи во македонското Собрание“, информираат од СДСМ.
И техничкиот министер за внатрешни работи Панче Тошковски вчера најави измени на Законот за изменување и дополнување на законот за патните исправи и Законот за безбедност во сообраќајот и рече оти измените ќе бидат итно доставени до Владата.
Заклучно со Законот за патни исправи кој е на сила, од утре пасошите кои се со старото име нема да важат. Согласно законот за безбедност во сообраќајот, од утре нема да важат ни возачките дозволи кои се со старото име Република Македонија, ниту за внатрешна, ниту за надворешна употреба.