Посебниот оддел за сузбивање корупција, организиран и меѓукантонален криминал при Врховниот суд на Федерацијата Босна и Херцеговина (ПОСКОК) соопшти дека сараевскиот рапер Буба Корели ја признал вината за затајување данок и дека на сметката на даночната управа уплатил вкупно 115.642 конвертибилни марки, пишува „Кликс.ба“.

ПОСКОК ја потврдил обвинителната постапка на Посебниот оддел на Федералното обвинителство на ФБиХ и го прифатил договорот за признавање вина против Амар Хоџиќ, познат како Буба Корели, роден во 1989 година во Сараево.

Според обвинението, Хоџиќ во периодот од 1 јануари 2017 до 31 март 2022 година, како даночен обврзник, свесно и со намера избегнувал да ги плати обврските пропишани со даночните закони на Федерацијата БиХ, како и придонесите за социјално осигурување. Тој не ги пријавувал своите остварени приходи што подлежат на оданочување, со што ги прекршил законските обврски.

Со постапување спротивно на законските одредби и со избегнување на плаќање данок на доход и здравствени придонеси за финансиски приливи добиени од странство, обвинетиот во наведениот период стекнал противправна имотна корист и ги оштетил буџетите и вонбуџетските фондови во Федерацијата БиХ за вкупен износ од 115.642 КМ.

Со тоа, според судот, сторил кривично дело даночно затајување согласно член 273 став 1 од Кривичниот законик на Федерацијата Босна и Херцеговина, во врска со член 55 од истиот закон.

На обвинетиот целосно му е одземена имотната корист стекната со кривичното дело, а Амар Хоџиќ, како даночен обврзник, во целост го подмирил својот главен даночен долг кон даночната управа на ФБиХ.

Инаку, Буба Корели и претходно бил осудуван за други кривични дела и има поминато време во затвор. Во 2019 година, тој беше осуден на една година затворска казна поради трговија со наркотични средства.