Денес во Кочани пристигна и беше официјално донирана втората пратка компресивна облека, обезбедена од граѓанската иницијатива „Сапорт Кочани“, наменета за повредените во трагичниот пожар во дискотеката „Пулс“ во март.

Во оваа пратка се вклучени 43 парчиња компресивна облека, изработени по индивидуални мерки за 17-мина од повредените. Облеката, вредна околу 4.500 евра, била испорачана во Македонија во понеделникот навечер, а денес е доставена во Општата болница во Кочани.

Ова е втора по ред испорака на компресивна облека што ја обезбедува иницијативата.

„Голема благодарност упатуваме до компаниите Julius Zorn GmbH и Health 2000, кои што овозможија квалитетна и навремена медицинска помош за што поголем број повредени. Во време на болка, солидарноста е најголем лек. Никој нема да биде сам. Делата зборуваат многу погласно од зборови, а ние не застануваме – продолжуваме посветено и одговорно, сè додека постои потреба и сè додека има луѓе што веруваат во хуманоста”, порачаа од „Сапорт Кочани“.