Санирани оштетени заштитни столбови на улиците во Централно градско подрачје
Екипите на ЈП „Улици и патишта“ кои ја одржуваат сообраќајната опрема на градските улици и булевари во теков на изминативе денови санирале оштетени заштитни столбови на повеќе локации особено во Централното градско подрачје.
– Оштетени заштитни столбови беа лоцирани на улицата Димитрие Чуповски на влезот кон плоштад Македонија, кај Триумфалната порта, на плоштадот Филип Втори, на улицата Македонија, како и на голем дел градски сообраќајници. Заштитните столбови редовно се санираат и се поставуваат нови по налог на Град Скопје поради зголемување на безбедноста на пешаците и велосипедистите, но и за спречување на непрописно паркирање на возилата – информираат од ЈП „Улици и патишта“.
Од ова јавно претпријатие меѓу другото велат и дека истите многу често се уништуваат од несовесни граѓани, па тие како јавно претпријатие апелираат до населението за поголема совесност и како што велат во поголема мера да се почитува сообраќајната опрема и сигнализација за да се одржи безбедноста за сите учесници во сообраќајот.