Руската православна црква ги осуди денеска луѓето кои одбиваат да се вакцинираат против ковид-19 како грешници и им порача дека ќе мора да се искупуваат до крајот на животот зошто Русија се соочува со уште еден скок на нови инфекции и смртни случаи.

Црквата ги повика сите свои верници да се вакцинираат откако денеска се регистрирани уште 24.353 нови случаи на ковид-19, од кои 6.557 во Москва, со што вкупниот број на заразени од коронавирусот од почетокот на пандемијата порасна на 5.635.294, пренесува Ројтерс.

Владината работна група за борба против пандемијата од коронавирус соопшти дека во изминатите 24 часа од последиците поврзани со коронавирусот починаа 654 лица, па вкупниот број на смртни случаи се искачи на 138.579.

Митрополитот Иларион, шеф на одделението за надворешни црковни односи на Московската патријаршија за државната телевизија изјави дека оние кои одбиваат да се вакцинираат прават грев за кој ќе мора да се искупуваат во текот на својот живот.

-Секојдневно сведочам за ситуации кога луѓето посетуваат свештеник за да признаат дека одбиле да се вакцинираат или делувале на своите блиски да не примат вакцина и така предизвикале нечија смрт, рече митрополитот Иларион.

Тој истакна дека е грев да се мисли само на себе, а не и на другите.