Градскиот совет на Мариупол, кој функционира во егзил откако Русија го окупираше градот во 2022 година, вчера објави сателитски снимки кои укажуваат на уништување масовна гробница во населбата Мангуш, во близина на Мариупол, објави „Киев индепендент“.

Локацијата била користена за погреб на жители кои загинале за време на руската опсада на градот во 2022 година, според Украинскиот центар за проучување на окупацијата.

Центарот анализираше сателитски снимки од гробницата, направени во периодот од 2022 до 2026 година. Подрачјето, каде што руските сили наводно формирале едни од првите масовни гробници, сега изгледа дека е претворено во локација за поправка на патишта.

Според прелиминарните проценки, најмалку 22.000 цивили беа убиени за време на 86-дневната руска опсада на Мариупол, наведува центарот.

„Вистинскиот број на жртви може да биде значително поголем. Руските окупатори го прикриваат вистинскиот обем на загубите, како и воените злосторства извршени за време на опкружувањето, бомбардирањето и окупацијата на градот“, соопшти Градскиот совет на Мариупол.

Руските власти негираат одговорност за воени злосторства во Мариупол и не го признаваат пријавениот број на жртви, честопати опишувајќи ги своите дејствија во градот како „ослободување“. Ископувањето на масовните гробници и идентификацијата на жртвите најверојатно ќе биде можно дури по деокупацијата на градот.

Со оглед дека Мариупол веќе петта година е под руска окупација и дека доказите на терен сè повеќе се уништуваат, изгледите за правда за жртвите од опсадата се сè помали.

Украинскиот документарец „20 дена во Мариупол“, во режија на Мстислав Чернов, прикажува дел од опсадата и ја освои наградата Оскар за најдобар долгометражен документарен филм на 96-то доделување на Оскарите во 2024 година.

Австријците кои присуствуваа на концертот на Томпсон во Загреб почнаа да добиваат казни