Тренерот на бугарскиот фудбалски клуб Лудогорец, Руи Мота, изјави дека неговиот тим нема да игра на нерешено, туку ќе бараат победа на гостувањето против Шкендија во првиот натпревар од плеј-офот за влез во лигашката фаза од Лигата на Европа.

Мечот на стадионот „Тодор Проески“ во Скопје ќе се игра в четврток, 21 август, од 20.00 часот.

– Натпреварите во Европа секогаш се тешки, но ние имаме свои силни страни. Го анализиравме противникот. Ова е тим против кој треба да постигнеме многу голови од ситуациите што ги имаме. Тимот работи добро, се надеваме дека сè ќе се развие добро. Знаете кој сум јас и колку е добар Лудогорец. Сакаме да победиме и утре нема да биде поинаку. Нема да играме на нерешено, туку ќе бараме победа и добар резултат – рече Португалецот Мота на аеродромот во Варна.

Тренерот на Лудогорец воедно информираше дека шведскиот дефанзивец Јоел Андерсон е повреден и нема да биде во составот за првите 90 минути против актуелниот македонски првак.

Главен судија на мечот во Скопје ќе биде Крис Кавана од Англија.