Еден рудар загина, а тројца се повредени во руски напад врз рудник за јаглен во сопственост на најголемата украинска енергетска компанија ДТЕК во близина на фронтовските линии во источниот регион Донецк, соопшти ДТЕК во вторник, пренесува Ројтерс.

Руските инвазиски сили во последните недели ја засилија својата офанзива во источна Украина, каде што се наоѓаат повеќето рудници за јаглен во земјата.

„Нападот ги оштети зградите и опремата на компанијата и предизвика прекин на електричната енергија. Во тој момент, 146 рудари беа под земја, а напорите за нивно извлекување на површината се во тек“, соопшти ДТЕК.

Не е прецизирана локацијата на целната мина, ниту пак е наведено како руските сили ја погодиле.

Украина овој месец соопшти дека мали групи руска пешадија се пробиле околу 10 километри кон главната одбранбена линија во близина на источниот град Добропилија, зголемувајќи стравувања од поширок пробив што дополнително би ги загрозил клучните градови.

Подоцна, украинските власти соопштија дека трупите на Киев го стабилизирале бојното поле во област на исток каде што руските сили направиле ненадеен напад за да ја пробијат украинската одбрана.