Американскиот државен секретар Марко Рубио е во нова мисија да ги смири нервозните американски сојузници во Европа околу намерите на администрацијата на Трамп кон НАТО или барем да им даде попријателско лице на наглите промени и на неизвесноста околу намалувањето на американските трупи во Европа, објави „Асошиејтед прес“.

Рубио денеска присуствува на состанокот на министрите за надворешни работи на НАТО во Шведска — истиот ден кога високи претставници на Пентагон треба да ги информираат 32-те членки на Алијансата во седиштето на НАТО во Брисел за плановите за американскиот воен ангажман во европската одбрана.

Состанокот на дипломатите, кој му претходи на самитот на лидерите на НАТО во Турција во јули, се одржува во услови на голема неизвесност околу тоа како ќе се развива војната во Иран и дали ќе продолжат блокираните американски напори за посредување за крај на руско-украинскиот конфликт. На континентот сè уште тлее и незадоволство поради критиките на претседателот Доналд Трамп кон сојузниците и неговиот интерес за преземање на Гренланд, територија на НАТО-сојузникот Данска.

Рубио честопати добива задача да биде помирното и помалку конфронтирачко лице на администрацијата на Трамп на вакви состаноци. Годинава беше испратен во неколку такви мисии, вклучително и на Минхенската безбедносна конференција во февруари, а неодамна и во Италија, каде што се сретна со италијански претставници и со папата Лав, откако Трамп го критикуваше американскиот понтиф за неговите ставови за криминалот и војната во Иран.

Дали ќе се намалат американските трупи во Европа?

Пред заминувањето на состанокот во Хелсингборг, Шведска, Рубио одби да прецизира какви промени се планираат во американското воено присуство во Европа.

Администрацијата на Трамп претходно стопираше распоредување војници во Полска и во Германија, но потоа најави дополнителни 5.000 војници за Полска, оставајќи нејасно дали станува збор за ново распоредување или промена на веќе планираните потези.

Претходно, американскиот државен секретар повтори дека Трамп и други претставници на администрацијата, вклучително и самиот тој, се „многу разочарани“ од НАТО, особено од реакцијата на Алијансата на војната во Иран.

— Мислам дека никој не е шокиран што САД, а особено претседателот, во моментов се многу разочарани од НАТО — им рече тој на новинарите во Мајами пред да се качи во авионот.

Русија психолошки ги тероризира балтичките држави

Рубио ги повтори критиките кон НАТО

Рубио рече дека е „силен поддржувач“ на трансатлантската воена алијанса и ја нарече важна.

Но, ги повтори забелешките дека некои сојузници во НАТО, особено Шпанија, одбиле да дозволат пристап до американските бази за конфликтот со Иран, а други биле воздржани, ако не и отпорни, кон приклучување на коалиција за повторно отворање и заштита на Ормускиот Теснец, клучна рута за транспорт на нафта што Иран во голема мера ја затвори.

— Знам зошто НАТО е добар за Европа, но зошто НАТО е добар за Америка? — праша реторички Рубио, а потоа самиот одговори, посочувајќи на базите што им овозможуваат на САД и на другите да проектираат моќ на глобално ниво.

— Значи, ако тоа е клучното образложение зошто сте во НАТО, а потоа имате земји како Шпанија што ни го одбиваат користењето на тие бази, тогаш зошто сте во НАТО?

Рубио истакна дека речиси сите сојузници во НАТО се согласуваат дека на Иран не смее да му се дозволи да развие нуклеарно оружје, но малкумина, ако воопшто некој, се вклучиле кога Трамп рече дека ќе преземе акција за да го спречи тоа.

— Тој не бара од нив да испратат војници. Не бара од нив да ги испратат своите борбени авиони. Но, тие одбиваат да направат што било, и мислам дека претседателот гледа на тоа и вели: „Чекајте малку“. Мислам дека бевме многу вознемирени поради тоа. Претседателот тоа многу јасно го кажа — рече Рубио.

Средба на НАТO во Шведска: Расположението било и подобро

НАТО се обидува да ја ублажи ситуацијата

НАТО официјално настојува да ги прикаже американските воени прераспоредувања како однапред планирани и очекувани, но дел од европските сојузници биле изненадени од најавите и од недостигот на јасна координација со Вашингтон.

Марк Руте порача дека Европа и Канада мора да преземат поголема одговорност за конвенционалната одбрана на Алијансата, особено на европскиот континент.

Според него, САД ќе останат вклучени во НАТО, но со текот на времето може да насочат дел од ресурсите кон други региони.

Американските воени претставници предупредуваат дека во Европа треба да се очекуваат нови намалувања на трупите.

Трамп рече дека Америка ќе прати дополнителни 5.000 војници во Полска