Рубиалес не сака да поднесе оставка по скандалот на Светското првенство за фудбалерки
Луис Рубиалес не сака да поднесе оставка од функцијата претседател на Шпанската фудбалска федерација по скандалозниот бакнеж што ѝ го даде на Џенифер Хермосо по освојувањето на Светското првенство за жени во фудбал, но наскоро би можел да остане без луѓе со кои би управувал.
Откако вчера првите луѓе на некои регионални шпански федерации поднесоа оставки на своите функции, тоа денеска го направија и тренерите во националните селекции.
Вкупно 11 машки и женски тренери поднесоа оставки, а сето тоа поради, како што истакнаа, неприфатливото однесување и изјавите на Рубиалес во последните денови.
– Наместо да зборуваме за успехот што го постигнавме, мораме да се бориме со вакви работи – напиша Монсе Томе, помошник тренер во сениорската женска селекција, на социјалните мрежи.
Покрај неа, оставки поднесоа и селекторот на репрезентацијата до 19 години, Соња Бермудез и нејзиниот колега во репрезентацијата до 17 години, Кенио Гонзало.
Да потсетиме, денеска ФИФА соопшти дека во саботата го суспендираше Луис Рубиалес на најмалку 90 дена „од сите активности поврзани со фудбалот на национално и меѓународно ниво“. На Рубиалес исто така му е забрането да контактира со Џенифер Хермосо.