Легендарниот поранешен бразилски фудбалски репрезентативец Роналдињо ја покажа својата целосна поддршка за Пари Сен Жермен во финалето на Лигата на шампионите против Арсенал што ќе се игра денеска од 18.00 часот во Будимпешта.

Роналдињо се огласи на социјалните мрежи за да покаже дека неговото срце останува поврзано со француските гиганти, каде што започна неговото големо патување во европскиот фудбал.

– Напред, Париз – напиша Роналдињо на својот X профил, придружувајќи ја пораката со фотографија од себе од периодот кога го носеше дресот на парискиот тим.

Бразилскиот офанзивен играч од средниот ред играше за ПСЖ помеѓу 2001 и 2003 година, оставајќи траен впечаток на Паркот на принцовите, имајќи 77 настапи во сите натпреварувања, запишувајќи 25 гола и 19 асистенции.

Има и уште еден интересен податок, за време на неговиот престој во француската престолнина, Роналдињо ја делеше соблекувалната со сегашниот тренерот на Арсенал, Микел Артета, против чиј тим Парижаните сега ќе стискаат палци за победа.

Allez Paris! 🔴🔵🤙🏾 pic.twitter.com/MUEpejVOJ3

— Ronaldinho (@10Ronaldinho) May 29, 2026