Издавачкиот центар „Три“ го промовираше најновото прозно дело на истакнатата македонска авторка Виолета Танчева-Златева. Промоцијата се одржа на 13 декември во Културно-информативниот центар во Скопје.

Промоторката на романот, Ана Јовковска, истакна дека „Бела Сама“ од Виолета Танчева-Златева е комплексен роман за женскиот принцип, траумата, патријархатот, клаустрофобијата на духот, мајчинството, растењето…

Со проникливи и суштински прашања Јовковска во разговор со авторката пред присутната публика успеа да отвори повеќе теми кои ги третира приказната на романот.

Книгата е вистинско обележје на македонскиот современ роман и навраќање кон човечките вредности, а едновремено е и чекор напред кон излегување од патријархалноста и стереотипите.

Виолета Танчева-Златева е поетеса, раскажувач, есеист, лектор. Родена е на 25 април 1968 г., во с. Бориево, Струмица. Дипломирала на Филолошкиот факултет во Скопје, на групата Југословенска книжевност. Член е на Друштвото на писателите на Македонија од 2000 година, како и на Здружението на лекторите на Македонија.

Пишува поезија и проза. Досега освоила прва награда за проза на анонимниот конкурс на „Ѓурѓа“ во 1991 г.; наградата „Браќа Миладиновци“ на Струшките вечери на поезијата во 2015 г. за стихозбирката „Година без лето“; наградата „Ацо Шопов“ на ДПМ во 2018 г. за книгата „Патот“.

Нејзиниот поетски ракопис „Глуво време“ во 2022 година е награден со „Антев златник“ на Меѓународната поетска манифестација „Анте Поповски – Антево перо“.

(Текстот е објавен во „Културен печат“ број 218, во печатеното издание на весникот „Слободен печат“ на 17-18.02.2024)