По повод 30 години од премиерата на македонскиот филм „Самоуништување“, Кинотеката на Македонија организира специјална проекција на ова впечатливо остварување кое и денес останува препознатливо по својот автентичен хумор, социјална критика и живописни ликови.

Играниот филм „Самоуништување“ (1996) е реализиран како македонско-турска продукција во режија на Ербил Алтанај и по сценарио на Сашко Насев. Филмот ја следи приказната за таксист кој, и покрај скромниот живот и секојдневните предизвици, успева да влијае врз луѓето околу себе и постојано да се наоѓа во необични и комични ситуации. Преку неговите доживувања, филмот создава слика за општеството и човековите слабости, раскажана со препознатлив македонски дух. Проекцијата на филмот во Кинотеката ќе се одржи на 19 јуни, со почеток во 20:30 часот.

Во главните улоги настапуваат Јовица Михајловски, Катерина Коцевска и Оливер Митковски, заедно со низа истакнати актери кои придонесуваат за богатата атмосфера и незаборавните сцени што филмот гo направија омилен кај публиката.

„Самоуништување“ е урбана трагикомедија чија тема е распаѓањето на семејството, кризата на поединецот врзана со духот на времето во кое се случува дејството, семејна морална драма која може да се смести во кое било време и место.

Куплунг (Јован) е таксист, човек без морални предрасуди, силеџија и љубовџија, човек што ги почитува само своите страсти. Сценариото суптилно назначува дека порано бил егзекутивец во валканите операции на комунистичката тајна служба, што само ја зголемува неговата фрустрација заради неостварениот, а посакуван општествен статус. Тој кон сопругата Стојна, работничка во фабрика, се однесува како кон сопственост, па таа ропски послушна ги исполнува неговите барања и го поднесува неговото грубо и простачко однесување. И Цоле, неговиот син студент, е малтретиран од него. Единствена слабост Куплунг покажува кон неговата љубовница Шила, кафеанска пејачка, која, сепак, се мажи за полицискиот инспектор Славчо (Цацко), брат на Стојна. Само тогаш Куплунг е исфрлен од шемата по која живее и веднаш бара нов сексуален објект. И Вилма, наивната девојка на Цоле, е можеби најтрагичната жртва на Куплунг: Куплунг ја силува, а таа потоа станува негова љубовница. Од оваа тајна врска Вилма забременува. При една брутална сцена на насилство на Куплунг врз Стојна, Цоле го напаѓа таткото и го удира по главата со пиштол. Куплунг потоа останува инвалид врзан за количка. Цоле се жени за Вилма, таа раѓа син, а Стојна и понатаму ропски ја поднесува судбината обременета со нови тешкотии.

Три децении по неговото прво прикажување, „Самоуништување“ останува важен дел од македонската филмска историја и сведоштво за едно време, еден менталитет и еден препознатлив филмски израз.