РФМ парично ги награди кадетите за одличното деветто место на Светското првенство
Македонската машка кадетска ракометна репрезентација се пласираше на историското деветто место на Светското првенство кое летово се одржа во Хрватска.
По повод тој голем успех Ракометната федерација на Македонија (РФМ) одлучи парично да ги награди кадетите предводени од селекторот Раде Стојановиќ.
Управниот Одбор на РФМ одреди парична награда во вкупна вредност од 1 милион денари за машката кадетска ракометна репрезентација (стручен штаб и ракометари родени 2004 и помлади).
На кадетскиот Мундијал нашите ракометни надежи остварија учинок од пет победи над Црна Гора, Грузија, Австрија, Унгарија и Чешка, и два порази од Норвешка и Данска.
– Без вашата желба немаше да верувате во победа. Без добар тренинг немаше да покажете борбеност. Без сонување за чекор плус немаше да има остварување – беше објавата на Стојановиќ на социјалните мрежи по одличното претставување на Македонија на СП.
