Фудбалот е пред нова можност за голема промена. Еден од најпознатите судии на сите времиња, Пјерлуиџи Колина, кој денес е претседател на судиската комисија на УЕФА, предложи револуционерна измена во правилото за изведување пенали.

Според неговиот предлог, повеќе нема да биде дозволено играч да постигне гол по одбиена топка од голманот. Тоа значи дека ниту изведувачот, ниту неговите соиграчи нема да можат да реагираат по првата одбрана — пеналот ќе има само еден обид, како во пенал-сериите по продолженијата.

„Веќе го спомнав ова во разговорите со ИФАБ (Меѓународниот одбор за фудбалски правила). Идејата е едноставна – еден удар, една шанса. Или гол, или гол-аут. Така ќе се намали хаосот со играчите што влетуваат предвреме и ќе се зголеми фер-плејот“, изјави Колина.

Овој предлог, кој веќе е доставен до ИФАБ, може да го промени начинот на кој ќе се изведуваат пеналите во иднина. Со оглед на угледот и влијанието на Колина, шансите за усвојување на ова правило се сосема реални.

Колина ја заврши својата блескава судиска кариера во 2005 година, судејќи финалиња на Лигата на шампионите, Светското и Европското првенство, а шест пати беше прогласен за најдобар судија во светот.