Женската фудбалска репрезентација на САД поднесе тужба против сопствената Федерација поради дискриминација и голема разлика во примањата во однос на мажите. Адвокатот Џефри Кеслер кој ги застапува сите 28 репрезентативки, е песимист дека ќе се постигне договор со фудбалска федерација на САД.

– За мене ова е случај кој сакам да го добијам на суд бидејќи ќе има ефект и на другите, не само на моите клиенти. Токму тоа е причината која овие девојки влегоа во оваа борба. Борбата против сопствената Федерација е и поради идните генерации, бидејќи многу од овие девојки ќе бидат во пензија кога ќе биде затворен случајот – изјави Кеслер.

Освен репрезентативките на САД, која е најуспешна женска репрезентација на светските првенства, помеѓу клиентите на Кеслер се наоѓаат и други познати спортисти, како Том Брејди (американски фудбал), Кастер Семења (атлетика) како и Оскар Писториус (атлетика) но него го застапуваше само во споровите кои беа поврзани со спортот.

– Ова е најочигледен случај на полова дискриминација. Девојките имаат ист работодавец и потполно иста работа, а се платени многу помалку – додаде Кеслер.

Борбата на репрезентативките на САД со сопствената Федерација започна во 2017 година, две години преговорите се во ќорсокак и токму затоа, фудбалерките се одлучија да поднесат тужба.