Македонскиот репрезентативец Стефан Ашковски е меѓу македонските граѓани кои беа извлечени од Иран по ескалацијата на конфликтот на Блискиот Исток. Од Министерство за надворешни работи соопштија дека фудбалерот бил безбедно евакуиран преку Турција, но засега нема официјална потврда дали сè уште се наоѓа таму или веќе се вратил во земјава.

Ашковски од јануари настапува за иранскиот прволигаш Мес Рафсанјан, каде што ја продолжи интернационалната кариера. Триесет и четиригодишниот дефанзивец зад себе има 40 настапи во дресот на македонската репрезентација и важи за еден од поискусните играчи во националниот тим.

Од МНР информираат дека досега околу 400 македонски државјани побарале асистенција за напуштање на кризното подрачје, а дипломатските служби се во постојана координација за нивна безбедна евакуација.