Редок портрет од австрискиот сликар Густав Климт беше продаден за 236,4 милиони долари на аукција во Њујорк, станувајќи второто најскапо уметничко дело и најскапото дело на модерна уметност некогаш понудено на аукција, пренесуваат странските медиуми.

Шест понудувачи лицитираа цели 20 минути за „Портретот на Елизабет Ледерер“, кој Климт го насликал помеѓу 1914 и 1916 година.

Сликата, висока речиси два метри, изработена во масло на платно ја прикажува ќерката на главниот патрон на Климт облечена во кинеско кимоно, како стои пред сина таписерија со мотиви инспирирани од Азија.

Аукциската куќа „Сотбис“, која го понуди делото на продажба, не го откри идентитетот на купувачот. Најскапата слика некогаш продадена на аукција останува „Спасител на светот“, која му се припишува на Леонардо да Винчи. Купена е во 2017 година за 450 милиони долари.

„Портрети во полна големина од оваа импресивна големина, и од најплодниот период на Климт (1912-1917), се исклучително ретки. Повеќето се во големи музејски колекции. Сликата понудена на аукција вечерва е еден од само двата такви нарачани портрети што остануваат во приватна сопственост“, изјавил претставник на „Сотбис“.

Сликата била украдена од нацистите за време на Втората светска војна и речиси била уништена во пожар, но во 1948 година му била вратена на братот на Елизабета, Ерих, кој бил чест мотив во делото на Егон Шиле, современик и пријател на Климт. Таа останала во сопственост на Ерих до 1983 година, кога ја продал. Тоа било две години пред неговата смрт.

Кога станува збор за делата на Климт, претходниот рекорд на аукција го држеше „Дамата со ладало“, која беше продадена во Лондон во 2023 година за 85,3 милиони фунти.