Тиквичките се незаменлив дел од трпезата во целиот свет и можат да се приготвуваат на различни начини – варени, пржени, похувани, печени…

По потекло од Америка, тие пристигнале во Италија кон крајот на 19 век, па оттука и нивното име на англиски е преземено од италијански – zucchini.

Станува збор за лесна намирница што не го оптоварува премногу дигестивниот тракт, а е многу хранлива.

Во 100 грама тиквички има само 16 калории, но имајте на ум дека хранливата вредност на тиквичката се менува во зависност од тоа како се подготвуваат.

Полнетите тиквички со пилешко месо освен што имаат неверојатен вкус, се идеален оброк за сите што внимаваат на својата линија.

Состојки:

– 3 главици кромид
– 3 чешниња лук
– 5 тиквички
– 3 парчиња пилешко филе
– црвен пипер
– сол
– црн бибер
– кечап
– 200 мл кисела павлака
– 200 г кашкавал

Подготовка:

На оган ставете да се пропржат ситно исечканиот кромид и лук заедно со остатоците од внатрешноста на тиквичките што претходно сте ги издлабиле и кои планирате да ги полните.

Откако зеленчукот ќе се пропржи, тргнете го од оган и оставете го да се излади.

Пилешкото месо исечкајте го на ситни коцки и кратко пржете го. Потоа, додајте го во останатата смеса. Посолете, ставете црн бибер и мелена црвена пиперка и промешајте.

Издлабените тиквички наполнете ги со вака подготвената смеса, наредете ги во претходно обложена тава за печење, па одозгора ставете им кечап и кисела павлака.

Вака подготвените тиквички печете ги во претходно загреана рерна на 150 степени околу 20 минути. Потоа извадете ги и врз нив изрендајте кашкавал.

Вратете ги да се допечат, односно да се растопи кашкавалот.