Растителната исхрана е сè попопуларна меѓу спортистите, но факт е дека и понатаму предизвикува бројни дилеми во општеството. Сепак, исхрана на база на намирници од растително потекло препорачува и нутриционистката Невена Веселиновиќ, која, меѓу другите, го советува и српскиот тенисер Новак Ѓоковиќ. Во 2010 година, тенисерот се откажа од глутенот, млечните производи и рафинираниот шеќер, а го намали и внесот на црвено месо. Денес, тој консумира само храна од растително потекло, па така во неговото мени се наоѓа многу овошје, житарки, киноа, ориз и сладок компир.

– Во првиот дел од денот јадам многу овошје. Не сакам да јадам никаква храна која бара многу енергија за да се свари, бидејќи ми треба многу енергија за тренинзите – објаснил Ѓоковиќ во гостувањето кај Греам Бенсинџер минатата година.

Денот го започнува со топла вода и лимон, а потоа пие сок од целер. Потоа следи зелено смути богато со хранливи материи и алги. Ова е во согласност со она што Веселиновиќ ги советува спортистите, како рекреативните, така и професионалните.

– Ако сакате да ги намалите масните наслаги, моја препорака е да изберете комбинација од растителни протеини (протеински прав) и влакна (темнозелебуит лиснат зеленчук) за појадок. Би ги избегнала бобинките – вели Веселиновиќ.

Таа ги советува оние кои сакаат да ја зголемат мускулната маса да се свртат кон овесната каша, бобинките и протеинскиот прав (0,9 грама на килограм телесна тежина) за појадок.

Нутриционистката вели дека најголемите грешки поврзани со исхраната на спортистите се случуваат по исцрпувачките тренинзи.

– Првото нешто што ќе го земете по тренинг во голема мера влијае на градењето на мускулите и токму тоа диктира дали ќе спречите воспаление. По тренингот треба да консумирате зелен чај, лимон, вода, ѓумбир. Веднаш потоа мора да ги надоместите истрошените резерви, а во тоа ќе ви помогнат урмите и бананите. Никако не препорачувам чоколадо, дури ниту протеински плочки со чоколадо, бидејќи содржат додаден шеќер – објаснила таа.

Во текот на денот, Веселиновиќ препорачува комбинација од растителни протеини (житарки како што се киноа и хелда и зелен лиснат зеленчук, црвена леќа) и влакна. За вечера, можете да изберете салати направени од микро билки и никулци, како и тофу сирење и мешунки.

– Не треба да имате предрасуди за тоа дека растителната исхрана нема доволно протеини и железо. Тоа е облик на исхрана која има толку многу позитивни аспекти – додала Веселиновиќ.