Размена во стилот на НБА лигата, вклучен и Манчестер сити во трансферот на Лаутаро
Се чини дека трите клуба се договорија и најдоа решение кое им одговара на сите.
Трансфер ѕвезда во летниот преоден рок се очекува да биде Лаутаро Мартинез, а неговото заминување во Барселона ќе биде во стилот на НБА лигата.
Бидејќи пандемијата на коронавирусот удри по економската моќ на екипите, во преодниот рок се очекува да има доста размени, а помалку купување на играчи со пари, и во ваква состојба во центарот на вниманието е Барселона.
Се поизвесно е дека Лаутаро Мартинез го делат недели од трансфер во каталонскиот клуб и тоа благодарение на Манчестер сити кој ќе се вклучи во размената.
Имено, Интер бара пари и десен бек, поточно Нелсон Семедо во замена за Лаутаро Мартинез. Проблем во оваа размена е што Семедо сака да се пресели во Премиер лигата, поточно во редовите на Манчестер сити и да игра кај Пеп Гвардиола. Семедо се очекува веднаш да обезбеди место во првиот тим и тоа на сметка на Кансело.
Португалецот минатата година пристигна во Манчестер сити од Јувентус, а претходно настапуваше за Валенсија и за Интер кој тогаш немаше 40 милиони евра за да го откупи неговиот договор.
Интер сака да го врати Кансело во своите редови и поради тоа ќе и дозволи на Барселона прво да направи „трампа“ со Манчестер сити во која екипите ќе си ги разменат десните бекови, а потоа Кансело ќе се пресели во Интер како дел од пакетот за Лаутаро Мартинез.