Разбиена мрежа за фалсификување на пари поврзана со мафијата Камора, уапсени 44 лица
Со апсењето на 44 лица е разбиена голема мрежа за фалсификување на пари поврзана со италијанската мафија Камора, соопшти француската полиција.
Во Италија се уапсени 40 лица, во Франција 3, и еден во Белгија, а целата операција е координирана од Европол.
Во акцијата се запленети 8 милиони евра во готово и имот во иста вредност. Номиналната вредност на фалсификуваните пари е 10 милиони евра.
Истрагата за мрежата за фалсификување пари е поврзана со неаполската мафија Камора која во јануари 2018 година ја покренаа италијанските власти, а се работеше за лажни банкноти од по 50 евра.
Наназад неколку години, 90 отсто од квалитетните лажни банкноти доаѓаат од Италија, а Камора има некаков вид надмоќ на тој пазар, рече Ерик Бертранд од Централната канцеларија за сузбивање на фалсификување на пари.
