Просечната нето-плата во август била 45.310 денари, објави Државниот завод за статистика. Овој просек е за 34 денари повисок отколку во јули кога просечната нето-плата изнесувала 45.276 денари, но е за дури 10,3 проценти повисок од просекот во август 2024 година. Ланскиот август просечната нето-плата била 41.097 денари, што значи дека за една година се зголемила за 4.213 денари.
Вредноста на синдикалната минимална кошница за август 2025 година изнесува 65.507 денари, а во август 2024 таа изнесувала 61.199 денари, што значи дека скокот на основните трошоци за живот на едно четиричлено семејство за една година биле 4.305 денари, а ова е износ малку поголем од растот на платите.
Но, во јавноста многу често се критикува износот на просечната плата, кој иако статистички е точен, не ја одразува вистинската состојба на најголем дел од граѓаните. Ова го илустрираше и Сојузот на синдикати, кој рече дека според последната анализа што ја побарале од УЈП, а која се однесува за мајските плати, 374.045 работници или 73,3 отсто од работниците примиле плата под просечната плата, а 135.915 работници или 26,7 проценти од работниците примиле плата над просечната плата.
И августовските податоци покажуваат дека највисока плата е во секторот „Информации и комуникација“ и таму просекот е 82.905 денари, а најнискиот просек е во секторот „Објекти за сместување и сервисни дејности на храна“ – 33.479 денари