Според протечен извештај од европска разузнавачка агенција до кој дојде Си-ен-ен, рускиот претседател Владимир Путин драстично го зголемил своето лично обезбедување поради страв од државен удар и од серијата атентати врз високи воени службеници.

Новите безбедносни протоколи вклучуваат строг надзор над персоналот во Кремљ, забрана за користење јавен превоз и задолжителна употреба на мобилни телефони без пристап до интернет. Самиот Путин ги ограничи своите движења, избегнувајќи ги вообичаените резиденции и воените објекти, а наместо тоа сè почесто престојува во специјални бункери во регионот на Краснодар.

Оваа параноја се случува во време на растечка нестабилност предизвикана од војната во Украина. Со проценки за околу 30.000 руски жртви месечно, застој на бојното поле и сè почести украински напади со дронови длабоко во руската територија – вклучително и врз елитни московски населби – економската и безбедносната цена на конфликтот почнува сериозно да ја погодува урбаната елита, која досега беше поштедена.

ВИДЕО | Дрон погоди луксузен облакодер во Москва

Разузнавачкиот извештај посебно го издвојува поранешниот министер за одбрана, Сергеј Шојгу, како потенцијален ризик за државен удар поради неговото големо влијание во воената команда. Апсењето на неговиот близок соработник, Руслан Цаликов, за корупција се толкува како прекршување на премолчениот договор за заштита меѓу елитите, што дополнително ги подгрева сомнежите дека и самиот Шојгу може да биде следната мета на чистките.

Ревизијата на безбедноста била дополнително забрзана по жестоката расправија во Кремљ кон крајот на минатата година, предизвикана од атентатот на генерал-потполковник Фанил Сарваров. На тензичниот состанок, началникот на Генералштабот, Валериј Герасимов, отворено го критикувал шефот на ФСБ, Александар Бортников, за неспособноста да ги заштити високите офицери. За да ја смири ситуацијата, Путин наредил проширување на надлежностите на неговата лична Федерална служба за заштита (ФСО), која сега ќе обезбедува дополнителни десет високи команданти.

Објавувањето на вакви доверливи информации од страна на западните разузнавачки служби е реткост. Тоа најверојатно претставува стратешки обид на Европа да ги потенцира, а можеби и да ги продлабочи внатрешните конфликти, деморализацијата и паранојата што го зафаќаат Кремљ, надевајќи се на внатрешен колапс на рускиот систем додека исцрпувачката војна продолжува.

Уапсен е трет човек за атентатот врз рускиот генерал Алексеев, дали и други функционери биле на нишан?