Руска невротехнолошка компанија спроведува експерименти со имплантирање невронски чипови кај птици, со цел нивно управување од далечина, покажуваат информации објавени во британскиот весник „Тајмс“.

Станува збор за компанијата „Неири“, која од ноември тестира т.н. „био-дронови“ – гулаби во чии мозоци се вградуваат електроди што овозможуваат насочување на нивното движење преку надворешни сигнали.

Птиците, како што се наведува, се опремени со минијатурни камери, контролни уреди и соларни панели.

Од компанијата тврдат дека ваквите биолошки носачи имаат значителни предности во однос на класичните дронови, бидејќи не бараат честа замена на батерии или слетувања, а нивното природно однесување во летот им овозможува долготрајни рути – и до 400 километри дневно без запирање.

„Неири“ наведува дека технологијата е наменета за цивилни цели, како пребарување и спасување и мониторинг на индустриски објекти.

Сепак, експерти предупредуваат дека ваквите решенија лесно би можеле да најдат и воена примена, особено во сферата на извидувањето.

Истражувачкиот портал „Т-инваријант“ објави дека компанијата добила финансирање „без преседан во руската невронаука“, вклучително и средства од Националната технолошка иницијатива и Фондацијата „Восход“.

Според анализите, ова значајно финансирање е поврзано со соработката на „Неири“ со Институтот за вештачка интелигенција при Московскиот државен универзитет.

Институтот го води Катерина Тихонова, 39-годишната втора ќерка на рускиот претседател Владимир Путин, за која западните медиуми подолго време пишуваат. Тихонова раководи и со истражувачката фондација „Инопрактика“, поддржана од Кремљ, а претходно се појави на државната телевизија зборувајќи пред компјутерски генерирана слика од глава поврзана со електроди.

„Секој што работи со невроуреди го разбира потенцијалот на технологијата, но и потенцијалот што таа го отвора за самиот човек“, изјави тогаш Тихонова.

Извршниот директор на „Неири“, Александар Панов, во јавноста тврди дека технологијата може да се прилагоди и за други животински видови, меѓу кои и гаврани.

Тој претходно привлече внимание со контроверзни изјави за создавање нова фаза на човечката еволуција, која ја нарекува „Хомо супериор“.

На социјалните мрежи, Панов пишуваше и за можноста за „репрограмирање“ на луѓе, вклучително и Украинци.

„Дури и ако по војната во Украина останат само 5 до 7 милиони корисни луѓе, тие можат да се репрограмираат, како и повеќето други, што е многу поевтино отколку создавање и одгледување личност од нашата сопствена култура“, напиша тој.

Покрај експериментите со птици, компанијата досега тестирала и користење електроди за контрола на крави и стаорци.