Во Музејот на РС Македонија на 6 ноември, од 11 до 13 часот, публиката ќе има можност да ја посети изложбата на уметницата Христина Иваноска со наслов „Документот што недостига: За методологијата (текст, глас и тело)“.

Прошетката низ изложбата ќе биде водена од уметницата Христина Иваноска, а ќе се одржи во рамки на „Маалски фестивал“, кој го организира КСП „Центар-Јадро“ во соработка со „Тиииит!Инк.“ и Центарот за истражување на национализмот и културата (ЦИНИК) – Скопје.

„Документот што недостига“ е долгогодишен истражувачки, концептуален и ликовен проект на Иваноска започнат во 2014 година, а кој се однесува на формите, наративите и естетиката на политичкото дејствување на жените во Македонија во првата половина на 20 век и нивното поврзување со денешните форми на отпор.

Во фокусот на овогодишниот проект е списанието „Македонка – Орган на АФЖ“, првото македонско женско списание, издадено на 7 ноември 1944-та година, три месеци по одржувањето на АСНОМ и прогласувањето на македонската држава.

Фокусирајќи се на својата методологија на работа, Иваноска издвојува три суштински поими на перформативното: текст, глас и тело, околу кои се конципира поставката. Изложбата е реализирана во рамки на проектот „Архиви на невидливите“ и ќе биде отворена за јавноста до 30 ноември.

(Текстот е објавен во „Културен печат“ број 153, во печатеното издание на весникот „Слободен печат“ на 5-6 ноември 2022)