Промоцијата на книгата „Ќе фатит бран“ од Долорес Атанасова – Лори ќе се одржи на платото пред МКЦ
Промоцијата на книгата „Ќе фатит бран“ од поетесата Долорес Атанасова – Лори, добитничка на книжевната награда „Тодор Чаловски“ за 2020 година, ќе се одржи на платото пред МКЦ, на 5 јуни (сабота), со почеток во 20 часот. На промоцијата ќе говорат Јане Чаловски и Биљана Стојановска, рецензент на книгата, а стихови ќе читаат Ана Голејшка Џикова, Снежана Стојчевска, Андреј ал-Асади и Јосип Коцев. Музиката за промоцијата е на Горан Атанасов, а видеото е дело на Гала Атанасова.
Долорес Атанасова – Лори е четвртиот добитник на наградата „Тодор Чаловски“, која Здружението за култура, литература и уметност „Галикул“ ја доделува од 2016 година како признание од областа на поезијата, книжевната критика, есеистиката и креативните прозни форми во знак на почит и сеќавање кон ликот и делото на својот основоположник и еден од најистакнатите современи македонски писатели, поетот, литературен критичар, преведувач и есеист Тодор Чаловски (1945–2015).
Автор на дизајнот на корицата на книгата „Ќе фатит бран“ е Илијана Петрушевска. Книгата е дел од годишната програма на „Галикул“ и е поддржана од Министерството за култура во програмата за издавачка дејност и манифестации за 2020 година.
(Текстот е објавен во „Културен печат“ број 83, во печатеното издание на „Слободен печат“ на 5-6 јуни 2021)