Во текот на ноќта и утрово се очекува зголемување на водостојот на река Вардар во средниот дел од течението, како и на реката Треска, соопшти УХМР и предупредува на внимателно движење покрај реките.

Оттаму велат дека и натаму има опасност од излевање на овие две реки. Во западните делови водостоите на реките се во опаѓање, и се очекува тој тренд да продолжи. Во источниот дел од земјата состојбата е мирна и единствено посериозно зголемување на водостојот имаше во крајниот долен дел од сливот на реката Струмица.

Поради излевање на Вардар од доцна синоќа се пренасочува и сообраќајот во гостиварско, информираат од АМСМ.

„На 15.02 од 22:45 часот, поради излевање на река Вардар, сообраќајот на регионалниот пат Гостивар – село Чегране е пренасочен од с. Чајле кон с. Старо Чајле кон село Форино, соопштија утрово од Авто-мото сојузот на Македонија.

Обилните врнежи што ја зафатија земјата вчера предизвикаа излевање на реки и сериозни поплави во западниот и северниот дел од Македонија. Најпогодени се општините Кичево и Сарај, каде се вршеше евакуација на жители и интензивна санација на штетите.

ВИДЕО | Поплави во Кичево, реки течат низ улиците, општината организира времено сместување на поплавените од „Прилепска“

Координацијата меѓу Центарот за управување со кризи, Дирекцијата за заштита и спасување и локалните самоуправи е интензивна, но на површина излегоа и проблемите со ограничените технички ресурси. Сепак, беше реализирана успешна спасувачка акција во селото Беловиште, каде беа извлечени заглавени лица.

Поплави во Сарај, механизацијата на терен