Пратеникот од ВМРО-ДПМНЕ, Дејан Проданоски, во вечерашната дебата во „Топ тема“ на „Телма“ тврдеше дека во случаите со поранешни функционери осомничени за злоупотреби се почитува презумцијата на невиност, но во исто време рече и дека ексфункционерите „се огрешиле од законот“ и „направиле криминал од епски размери“.

„Оние кои се огрешиле од законот во изминатите седум години е дегутантно да ги браниме, а направиле криминал од епски размери“, рече Проданоски реплицирајќи му на соговорникот, Митко Трајчулески од СДСМ.

„Јавноста очекува разрешница на сите случаи коишто беа спомнати. Презумцијата на невиност се разбира дека се почитува, меѓутоа треба институциите на системот, односно онаа трета власт треба да почне да функционира, а знаеме дека длабоко во нејзе се вкоренети луѓе коишто биле директни членови или високи партиски функционери на партијата којашто сега е во опозиција“, вели Проданоски.

Трајчулески за ситуацијата со Груби: Или државата затаила или имаме договорено бегство