Принцот Хари за денот кога се родил: Знаете ли што ѝ рекол татко ми на принцезата Дијана тогаш?
Се ближи датумот кога ќе бидат објавени мемоарите на принцот Хари, со наслов „Spare“ („Резерва“), во кои тој ќе открие бројни пикантерии од животот на британското кралско семејство.
Меѓу другото, принцот ќе раскаже и за настаните на денот кога се родил – 15 септември 1984 година. Според напишаното во книгата, кралот Чарлс Трети ѝ рекол на принцезата Дијана, мајката на принцот Хари: „Прекрасно! Сега ми дадовте наследник и ‘резерва’ – мојата работа е завршена“.
Ова е дел од претстојната автобиографија на војводата од Сасекс, која ќе биде објавена на 10 јануари, чии делови веќе протекоа во „Гардијан“.
Британските медиуми пренесуваат дека принцот Хари намерно го избрал тој погрден наслов на книгата, кој, всушност, е назив за личност која е втора во редот за наследување на престолот и и веројатно никогаш нема да стане монарх.
Овие тврдења на принцот Хари доаѓаат откако тој го обвини британското кралско семејство за „протекување“ информации на медиумите.
Потоа, тој изјави дека сака да ги поправи односите со татко му, кралот Чарлс, и брат му, принцот Вилијам, па, сосема контрадикторно, ја сподели информацијата дека брат му Вилијам физички го нападнал при расправија за бракот со Меган Маркл. Хари тврди дека Вилијам ја нарекол американската актерка „тешка“, „безобразна“ и „токсична“.