Издавачката куќа „Артконект“ од Скопје со поддршка од програмата „Креативна Европа“ ја објави книгата раскази „Среќни падови“ од современата украинска писателка Евгенија Белорусец. Преводот е на Андреј Јованчевски.

Кратките прози во збирката „Среќни падови“ се засновани на вистински луѓе и настани и ги истражуваат искуствата на жените од регионот Донбас, кои поради војна се принудени да живеат како бегалки – пренесувајќи ги вистинските приказни во доменот на фикцијата и создавајќи хибридна книга, авторката слика фрагментарна и интимна панорама на болките на нашето време.

Притоа, не само ликовите, туку и ситуациите за кои пишува авторката се пренесуваат од контекстот на секојдневното во контекстот на книжевното очудување: една бегалка не може да се раздели од својот стар скршен чадор како тој да ѝ е најблизок роднина; доброволка во војска решава да се омажи за војната; за време на празникот на жената една девојка решава да седне на земја и никогаш повеќе да не стане во знак на протест; негувателка на стари лица ги спасува своите штитеници од ангелот на смртта.

Бидејќи авторката покрај со пишување успешно се занимава и со фотографија, меланхоличните, романтични и иронични кратки прози од „Среќни падови“ се дополнети со дваесетина фотографии на Белорусец, кои со својот лирски и историски контрапункт формираат сопствен впечатлив визуелен наратив.

Евгенија Белорусец (Киев, 1980) работи како фоторепортерка за повеќе европски медиуми, меѓу кои и реномираниот германски весник „Дер Шпигел“. Членува во интердисциплинарниот уметнички колектив „Худрада“ и основачка е на списанието за уметности „Простори“. Пишува раскази, дневници и репортажи.

(Текстот е објавен во „Културен печат“ број 333, во печатеното издание на весникот „Слободен печат“ на 23-25.5.2026)