Претседателот на Организацијата „Мис Универзум“ се огласи со информации за здравствената состојба на претставничката на Јамајка, Габриел Хенри, која падна на сцената за време на прелиминарниот натпревар. Според неговото соопштение, Хенри добро се опоравува и набрзо треба да биде пуштена од болница, пренесува „Пипл“.

Да потсетиме, Габриел Хенри падна за време на ревијата на вечерни фустани на 74. избор за Мис Универзум во Бангкок, во средата на 19 ноември, по што итно беше однесена во болница.

Организацијата ги покрила сите трошоци

Во објава на Инстаграм, претседателот Раул Роча се осврна на „недамнешните шпекулации“ и истакна дека јавноста треба да добива „точни, јасни и со почит ажурирани информации“ за состојбата на Хенри.

Тој нагласи дека, од почит кон семејството, деталите од нејзината здравствена состојба нема да се откриваат јавно. Според него, таквите информации треба да се споделуваат само тогаш кога семејството или самата Габриел ќе одлучат. Роча потврди дека веднаш по падот била организирана брза медицинска интервенција.

„Лично излегов на сцената за да ѝ помогнам, ја организирав итната медицинска нега и го надгледував нејзиниот транспорт до болница“, изјави тој, додавајќи дека останал во болницата со нејзиното семејство.

Тој откри и дека се воведени дополнителни мерки на претпазливост, вклучувајќи ангажирање медицински експерти за попрецизна процена на состојбата. Потврди и дека Организацијата „Мис Универзум“ ги покрила сите трошоци за сместување, медицинска грижа и патување за Хенри и нејзините најблиски.

Добри вести по денови на загриженост

„Последните четири дена беа исполнети со тешки моменти и неочекувани грижи“, напиша Роча. „Но благодарение на врвната медицинска грижа, сите предизвици беа успешно надминати.“ Според најновите лекарски извештаи, Хенри е во стабилна состојба и се очекува наскоро да биде пуштена од болница.

„И покрај неоснованите шпекулации што циркулираа, нашиот фокус беше исклучиво на нејзината грижа и опоравување. Пресреќни сме што е близу до отпуст“, додаде тој.

По падот, Хенри беше изнесена од сцената на носилки. За време на престојот во Тајланд со неа постојано беа нејзината сестра Филиша Хенри-Самјулс и мајка ѝ Морин Хенри.

Нејзината сестра претходно изјави дека Габриел не се опоравува толку брзо колку што се надеваа, но дека болницата ѝ обезбедува соодветна грижа. Исто така беше соопштено дека Хенри ќе остане најмалку седум дена на интензивна нега за постојан мониторинг на нејзината состојба.

ВИДЕО | Заврши во болница: Мис Јамајка падна од бината додека дефилираше во вечерна облека