Премиера на современиот балет „Пепелашка“ во Националниот балет
Националната опера и балет (НОБ) ја најави најновата балетска продукција, современиот балет во три слики „Пепелашка“ од Сергеј Прокофјев со кореографија на Александар Илиќ од Србија. Премиерата на „Пепелашка“ е закажана за 19 ноември, во 19 часот, а првата реприза ќе се одржи на 25 ноември.
На прес-конференцијата за премиерата на балетот „Пепелашка“ се обратија Васо Ристов, директор на НОБ, Олга Панго, раководител на Националниот балет, кореографот Александар Илиќ (Србија), сценографот Филип Коруновски и костимографката Катерина Радошевиќ Галиќ (Хрватска).
Кореографот Александар Илиќ е прв солист на Народно позориште во Белград. Работи како кореограф и професор, а основач е на Институтот за уметничка игра. Од 2019 година е директор на Културниот центар на Белград. Досега работел на повеќе опери, поставил балетски претстави, танцови перформанси и инсталации, како и претстави за деца.
Балетската претстава „Пепелашка“ во НОБ е наменета за сите генерации гледачи, не е работена според моделот на „Дизни“, туку содржи елементи на модерниот и класичниот балет. Во насловот е додаден хаштаг „Љубов“.
Кореографот Александар Илиќ посочи дека е многу важно да се поставуваат класични дела, кои се дел од растењето и созревањето на сите генерации.
– Кога почнав да размислувам за современа поставка на „Пепелашка“, важно ми беше да се задржи оригиналното либрето, но и да се следи современоста. Да направиме претстава која може да комуницира низ современ кореографски јазик – истакна Илиќ.
Дејството во „Пепелашка“ е сместено во 1970-те години, во времето на премиерата на познатиот филм „Брилијантин“. Како и во секоја бајка, во претставата има и добрина и зло, има верба за поубав живот и има љубов, а претставата завршува со хепиенд и „сите живееја среќно до крајот на животот, многу среќно, бидејќи ’Love is in the Air‘“.
Во балетот играат Христина Наќевска како Пепелашка, Мирослав Митрашиновиќ како Принцот, Саша Евтимова, Марија Јосифовска-Ристовска, Ендру Кук (Англија), Кристијан Јангос, Драган Кочоски и Гала Кочевска, како и балетскиот ансамбл на НОБ.
Адаптацијата на музиката е на Георг Драушник Хрватска), а асистенти на кореографија се Саша Евтимова и Мојца Мајцен (Словенија). Дизајнер на светло е Милчо Александров.