Данскиот уметник кој позајми голема сума од музејот во Алборг за две уметнички дела, а потоа изложи празни рамки, според судскиот налог ќе мора да ги врати парите, пишува „Гардијан“.

Јенс Ханинг, концептуален уметник чија работа се фокусира на моќта и нееднаквоста, доби провизија во 2021 година од Музејот за модерна уметност во Алборг, северна Данска. Задачата му беше да се реконструираат две претходни дела со десетици банкноти, кои ги претставуваат просечните приходи во регионот.

Делото на Ханинг од 2007 година, „Просечен дански годишен приход“, содржи банкноти од дански круни прикачени на платно, додека друго дело од 2011 година, инспирирано од австрискиот приход, содржи банкноти од евро.

Музејот обезбедил околу 532.000 круни, што е околу 71.500 евра, од своите резерви за изработка на споменатите уметнички дела, како и хонорарот на уметникот од околу 40.000 круни, што се дополнителни 5.300 евра.

Меѓутоа, кога вработените во музејот ги отпакувале доставените дела, пронашле две празни рамки со наслов „Земи ги парите и бегај“.

Музејот изложил нови уметнички дела, а кога Ханинг одбил да ги врати позајмените пари, против него беше преземена правна постапка.

На 18 септември судот во Копенхаген му одреди на уметникот да ги врати позајмените пари, но беше нагласено дека треба да му се исплати авторскиот хонорар.

„Ние не сме богат музеј. Мораме внимателно да размислиме како ги трошиме нашите средства и да не трошиме повеќе отколку што можеме да си дозволиме“, изјавил Ласе Андерсон, директор на музејот Кунстен.

Ханинг се бранеше велејќи дека: „работата, односно делото е во тоа што им ги земав парите. Тоа не е кражба. Тоа е прекршување на договорот, а прекршувањето на договорот е дел од концептот“.