Прамен од косата на легендарниот музичар Боб Марли се појави на аукција, а се очекува да достигне цена од околу 25.000 фунти.

Овој редок предмет, долг околу 3,8 сантиметри, се продава преку аукциската куќа „Инвалуабл“ и доаѓа заедно со оригинален автограм од Марли.

Според описот, станува збор за „исклучително редок дел од историјата на реге музиката и поп-културата“, а ова е првпат по 20 години да се појави автентичен примерок од коса на Боб Марли на продажба.

Праменот потекнува од 1978 година, кога сегашниот сопственик, тогаш како тинејџер, присуствувал на снимањето на емисијата „Топ оф д попс“ во Лондон.

Тој раскажал дека во тоа време било дозволено публиката да се качи на сцената по настапот на музичарите.

„Откако Боб Марли заврши со настапот, јас и еден пријател се качивме на сцената. Тој се смееше, па го прашав дали можам да земам мал дел од неговата коса. Само кимна и се насмеа, па јас завртев и земав мал прамен. Ми даде и автограм, кој го чувам до денес“, раскажал сопственикот.

Автограмот е напишан со сино пенкало и гласи: „За Андреа, со љубов, Боб Марли“.

Покрај праменот и автограмот, во пакетот се наоѓа и промотивен флаер од емисијата, на која настапиле и групите „Блек Сабат“, „Тин Лизи“ и други.

Почетната цена на аукцијата е 5.000 фунти, а наддавањето ќе трае до 9 април.