Повеќе поштенски служби низ Европа денес објавија дека ги суспендираат пратките до Соединетите Американски Држави поради нејасни правила во врска со новите увозни давачки.

Поштенските служби во Германија, Данска, Шведска и Италија објавија дека веднаш ќе престанат да испраќаат поголем дел од стоките во САД. Франција и Австрија ќе се приклучат во понеделник, а Велика Британија во вторник, објави АП.

Според извршната наредба потпишана од претседателот Доналд Трамп минатиот месец, меѓународните стоки претходно ослободени од американските царини во вредност помала од 800 долари, ќе бидат предмет на увозни давачки почнувајќи од 29 август, а писмата, книгите, подароците и малите пакети во вредност помала од 100 долари ќе останат ослободени.

Трговската рамка договорена меѓу САД и Европската унија минатиот месец воспостави царина од 15 проценти за повеќето производи испратени од ЕУ.

Многу европски поштенски служби објавија дека ги паузираат испораките бидејќи не можат да гарантираат дека стоките ќе пристигнат во САД пред 29 август, наведувајќи неизвесност околу тоа кои стоки се опфатени со новите правила и недостаток на време за обработка на сите нивни импликации, потсетувајќи дека испораката преку услуги како што е DHL Express е сè уште можна.

ПостЕуроп, здружението на 51 европски јавни поштенски оператори, соопшти дека доколку не се најде решение до 29 август, сите членови на здружението веројатно ќе го следат примерот.